semar badra

Semar Badra

Wonten ing Kahyangan Suralaya wonten gonjang-ganjing politik amargi ambisi kekuasaan ing kahyangan. Bethara Tunggal paring dhawuh dhateng putra-putranipun inggih menika Bethara Teja Maya (putra barep), Bethara Ismaya (putra tengah) saha Bethara Manik Maya (putra ragil) supados ngatonaken dayanipun ingkang digdaya saha langkung kiyat badhe dados panguwasa Kahyangan Suralaya. Bethara Manik Maya licik, piyambakipun nyuwun tulung dhateng Jik Maya supados saged biyantu ngusir kakang-kakangipun, piyambakipun mitnah kakang-kakangipun kanthi cara nyelehaken jimat Cupu Manik Asthagina wonten ing sangandhaping papan kangge sarenipun Bethara Teja Maya saha jimat Roning Lata Wahusadi wonten ing sangandhaping papan sare Bethara Ismaya. Ramanipun (Bethara Tunggal) percaya dene putra kekalih menika nyolong. Lajeng putra kekalih menika dipundhawuhi supados ninggalaken kahyangan.

Bethara Ismaya mandhap dhateng Gunung Tidar. Nindakaken bebadra bangun sarana saking dhasar kanthi manah ingkang kawedhar kangge paring piwulangan maknanipun gesang kanthi dhasar tri dharma ingkang intinipun keimanan, kemandirian, saha kawaskithan.

Jik Maya menika sadar menawi piyambakipun lepat, lajeng nyuwun pangapura dhateng Bethara Ismaya saha ngandharaken bilih Bethara Manik Maya menika ingkang sampun mitnah piyambakipun. Jik Maya anggadhahi pamanggih bilih piyambakipun badhe ngandharaken wonten ing Kahyangan Suralaya menawi Bethara Manik Maya menika licik satemah Bethara Manik Maya dipunusir saking Kahyangan saha Bethara Ismaya saged dados panguwasa wonten ing Kahyangan Suralaya. Ananging Bethara Ismaya boten sarujuk kaliyan pamanggih kala wau amargi menawi kados menika sami mawon piyambakipun dhamel cilaka dhateng sedherekipun, pramila Bethara Ismaya tetep manggen wonten ing Gunung Tidar.